De Fritzli fasst en Entschluss
er isch hüt bsunders im Schuss
de Götti het ihm gschrybe
jetzt werdi nid Diheime blybe.
Am Morge, wenns verrusse no dunkel isch
sitzt de Fritzli am Zmorgetisch
d'Ovo trinkt er mit Rasse
er wott jo nid de Zug verpasse.
Syn Götti stoht uf em Perron zwei
er isch froh, will er nid gärn usfahrt ellei
und bald rollt de Schnellzug y
no viel anderi Lüt sind do derby.
Zwüsche Züri und em Walesee
tuet dr Götti em Fritzli en Zettel geh
wo mes Ziel gseht ufemene Bild
das macht euse Fritzli no ganz wild.
Mir Wend bald umstyge
chasch denn de Rucksack wieder umebyge
wie strahlet de Fritzli uf em Bahnhof Chur
wo'n er no ghört "Abfahrt ohne Halt bis Filisur"!
"Goht's no lang"? .. das isch die Frog
für de Götti aber kei Plog
öppe zwee Stund muesch scho no warte
lueg, i zeig ders do uf dere Charte.
De Fritzli liest so vo dr Bernina-Bahn
do dervo isch er en bsundere Fan!
Er freut sich riesig uf dr RhB
wo n'er uf dr Fahrt viel schöni Berge cha gseh.
Do gits z'luege links und rechts gar viel
es heisst Alp Grüm , usstyge, mir sind am Ziel!
De Himmel blau, in bester Luune
cha me de Palügletscher vi-ä-vis bestuune.
Uf dr Terrasse, das tuet de Fritzli nie vergesse
dörf er mit em Götti go PIZZOCCHERI esse
und nach em Dessert mit emene Stück Chueche
goht me no dr Alpegarte go bsueche.
Mit em BERNINA-EXPRESS , wo chunnt steil deruf z'fahre
cha me fascht nid istyge, s'het Lüüt i Schare
is Veltlin, em Le Presesee, me cha nid luege gnue
gohts halt leider wieder em Underland zue.
|
